ЖАЗҒЫ ДЕМАЛЫСТА БАЛАЛАРДЫҢ ҚАУІПСІЗДІГІ БАСТЫ МӘСЕЛЕ

Бүгін Қызылорда облысының білім басқармасының ұйымдастыруымен

№101 мектептің мәжіліс залында жиын өтті. Жиынға облыстық білім басқармасы басшының орынбасары Бердаулетов Бағдат, Полиция департаменті басшысының бірінші орынбасары, полиция полковнигі Ермахан Абдраманов, білім бөлімінің қызметкерлері, мектеп директорлары, полиция қызметкерлері және ата-ана комитетінің төрағалары қатысты.

Бас қосудағы басты мәселе балалардың қауіпсіздігін қамтамасыз ету болды.

Жасөспірімдер арасындағы және оларға қарсы жасалған қылмыстар қазіргі таңда өзекті мәселелердің бірі болып отыр.

Мемлекет басшысының тапсырмасына сәйкес кәмелетке толмағандардың құқығын қорғау бойынша өңірімізде тиісті жұмыстар атқарылуда.

«Білім беру мекемесінің қауіпсіздігі – бұл білім беру мекемесінің жергілікті атқарушы және құқық қорғау органдарымен бірлесіп жүзеге асыратын іс-шараларының жиынтығы. Балалардың қауіпсіздігін қамтамасыз ету маңызды бағыттардың бірі. Осы бағытта жұмыс жасауымыз керек. Облыс орталығында 71 жалпы білім беру мекемесі бар, олардың 68 бейнебақылау жүйесімен жабдықталған, жеке күзет ұйымдарының күзет қызметімен 58 мектеп қамтылса, 23 мектептің «дабыл тетіктері» Полиция департаментінің Жедел басқару орталығына қосылған. Әрине, мектептерде бейнебақылау камераларының болуы құқықбұзушылықтың алдын алуға оң әсерін тигізеді, ал олардың ПД ЖБО-на қосылуы заңсыз сипаттағы түрлі көріністерге жедел ден қоюға мүмкіндік береді», - деді Қызылорда облысы ПД бастығының бірінші орынбасары полиция полковнигі Ермахан Абдраманов.

Полиция полковнигі Е.Абдраманов оқу жылының аяқталуына орай өткізілетін іс-шаралар кезінде жас түлектердің беймезгіл уақытта жүрмеуі, кортежге шықпауы, отырыстар жасамауы, белгіленбеген жерлерге суға түспеулері бойынша ата-аналар жиналыстарында хаттамалау арқылы түсіндірме жұмыстарын жүргізуді тапсырды.

Қызылорда өңірінің полицейлері бұл шаралардың өткізілуі кезінде қоғамдық қауіпсіздікті күшейтіп, қоғамдық тәртіп пен жол қауіпсіздігін қамтамасыз етуге жұмылдырылатын болады.

Сонымен қатар, ПД бастығының бірінші орынбасары жаз мезгіліндегі балалардың қауіпсіздігі мәселесіне ерекше тоқталды. Жазғы демалыс уақытында балалардың жеке қауіпсіздігі, оның ішінде суға шомылу кезіндегі қауіпсіздік шаралары ата-аналардың немесе оларды алмастыратын адамдардың ерекше назарында болуы қажет.

Балалардың жеке басының қауіпсіздігін қамтамасыз ету мақсатында учаскелік полиция инспекторларымен бірлесе ювеналды полиция қызметкері кезекшілікке бөлініп, қызмет атқарады.

Жасөспірімдердің көптеп шоғырланатын орындарда, қалалық демалыс паркінде олардың кешкі серуендеуі кезінде қауіпсіздіктерін қамтамасыз ету мақсатында арнайы қызметкерлер бөлініп, ата-аналар мен оқушыларға түсіндірме жұмыстарын жүргізілетін болады.